Prentsa-oharrak

Donostian, 2024ko otsailaren 5ean.- CAF Taldeko trenen seinaleztapen-negozioak treneratutako bere ERTMSarekin ekipatzeko kontratatutako 450 ibilgailu baino gehiagorekin amaitu du 2023a. Hori dela eta, Taldeko enpresa gisa daramatzan 14 urte hauetan, dibisio horrek izandako erregistro onena izan da hori.

Lehen kontratua sinatu zuenetik hamarkada bat baino gutxiago igaro denean, enpresak treneratutako ERTMS eta ATO (Automatic Train Operation) sistemekin ekipatutako ibilgailu kopurua 1.300 baino gehiagokoa da (era guztietako ibilgailuetan, berrietan zein birgaitu beharrekoetan).

Hamar urte hauetan, CAFek seinaleztapen arloko presentzia geografikoa bost kontinenteetako lautan hedatu du eta, zehatzago esanda, dozena bat herrialde baino gehiagotan ditu proiektuak abian: Espainia, Herbehereak, Txekiar Errepublika, Eslovakia, Polonia, Hungaria, Erresuma Batua, Zeelanda Berria, Australia, Mexiko, Uruguai, Arabiar Emirerri Batuak edo Arabia.

Hasiera-hasieran, seinaleztapen-filialak bere lehen esperientzia eta erreferentziak CAFeko ibilgailuen negozioak eskainitako babesari eta bultzadari esker lortu zituen. Dena den, urteen poderioz, negozioak Taldearen babesetik kanpo ere haztea lortu du. Hala, material gurpildunaren beste fabrikatzaile eta erreferentziazko operadore batzuei eskaintzen dizkie zerbitzuak: Renfe, Euskotren, NS, Deustche Bahn, KiwiRail, Ceské Dráhy edo SZDC, adibidez.

2023an treneratutako ERTMSarekin ekipatzeko 450 ibilgailu baino gehiagorako kontratuak sinatu zituenez,  iaz seinaleztapenarekin lotuta kontratatutako ekipoei dagokienez CAF hornitzaile nagusietako bat da mundu osoan.

Hain zuzen ere, gaur egun CAF liderra da treneratutako tren arloko seinaleztapenean zenbait herrialdetan: Txekiar Errepublikan, adibidez, treneratutako ERTMSarekin ekipatutako 400 ibilgailu baino gehiago ditu; edo Herbehereetan, berriz, 275 erreferentzia baino gehiago. Era berean, Zeelanda Berrian treneratutako ERTMSari dagokionez, merkatu-kuotaren % 100 lortu du eta, horrekin lotuta, aipatu beharrekoa da herrialde horretan, gainera, ATOa duten flotetako bat ERTMSen gainean ekipatu dutela.

Gainera, iazko ekitaldiaren amaieran, ereduzko (First in Class) hogei ibilgailu baino gehiago jarri zituzten abian Txekiar Errepublikan, Polonian eta Mexikon, adibidez.