Prentsa-oharrak

2014/06/30

EUSKOTRENek CAF ENPRESARI ESLEITU DIO 28 TREN BERRIEN FABRIKAZIOA

Euskotrenek CAFi esleitu dio 28 unitate berri fabrikatzeko lana, 150 milioi euroko zenbatekoaren trukean. Unitate horiek aukera emango dute Metro Bilbaoko 3. lineako beharrizanak betetzeko etorkizunean —gaur egun eraikitze fasean dago linea hori—, baita Euskotreneko tren-parke mugikorraren modernizazio-prozesuarekin jarraitzeko ere, 200 eta 300 serietako unitate zaharrenak ordezkatuz.

Unitate berriek tren-sektoreko berrikuntza teknologiko aurreratuenak izango dituzte teknologian, fidagarritasunean, iraunkortasunean eta ergonomian, eta azken 900 serieko trenen antzeko diseinua mantenduko du, zeina azken joeretan oinarritzen baita. 

CAFek 2015etik 2020ra bitarteko epean entregatu beharko dizkio unitate berriak Euskotreni. Horrenbestez, lehenengo trenak erabiltzeko moduan izango ditu Euskotrenek 2016. urtearen bukaerarako, urte horretarako baitago aurreikusita Metroko 3. linea martxan jartzea, Bizkaiko Etxebarri eta Bilboko Matiko auzoaren artean.