2014/11/17
Metrorex enpresak —Bukaresteko metro-sistemaren operadorea da— baieztatu du CAFi kontratua luzatu zaiola Errumaniako hiribururako metro-unitateak hornitzeko.
Kontratuaren luzatze horretan, 8 metro-unitate egin beharko ditu CAFek, 2011ko irailean esleitu zitzaizkion 16 unitateez gainera. Hasierako 16 unitate horiek Bukaresten erabiltzen ari dira dagoeneko. Luzatze horren zenbatekoa 47 milioi euro da gutxi gorabehera, eta Europako Inbertsio Bankuaren funtsekin finantzatuko da.
Unitate berriak oraintsu entregatu direnen antzekoak izango dira: altzairu herdoilgaitzezko 6na kotxekoak, haietako lau motordunak eta bi atoiak. 114 metroko luzera dute, tren osoan zeharreko korridorea dute, eta 1.200 bidaiari har ditzakete.
Pertsonen garraio masiborako diseinatutako ibilgailuak dira, eta kalitate- eta segurtasun-estandar gorenak betetzen dituzte; mugikortasun murriztuko pertsonak erraz sartzeko modukoak dira, eta gurpil-aulkiak erabiltzen dituztenentzako guneak dituzte.
Beste behin ere, konpainiak Europako merkatuan presentzia handitzeko egiten duen apustua berresten du kontratua luzatze horrek; hain zuzen, merkatu horretan kontratu garrantzitsu bat esleitu diote berriki, Herbehereetako NS enpresarentzako unitateak egiteko; hala, bat egiten du Belgrad, Istanbul, Stockholm, Tallinn, Helsinki, Erroma eta Europako beste hainbat hirirekin, non CAF dagoeneko proiektuak garatzen ari baita.
Joan prentsa-oharretaraKontsultaren bat egin nahi izanez gero, jarri harremanetan Prentsa Sailarekin: